1
GIZA GARAPENA
Ez ote zaigu geuri ere gertatu
hiriko zeru urdinean txilioka
dabiltzan kaio ero horiei bezala?
Ez ote dugu geuk ere aldatu
itsaso eder, garbi, hondargabea
hondakindegi satsu honen trukean?
2
FIRIN-FARAN
Haizea dabil gaur,
firin-faran, haizea…
Oihalak harroturik,
ur gainean ontziak;
zeru azpian hodeiak
ere bazterren bila.
Arras hustu dituzte
lekuak gaur txoriek,
firin-faran, haizea
igaro dadin libre.
Itsasoa eta urtzia
elkartzen diren marran
zein ote da kaioa?
zein uhinen aparra?
Sokan hedatu arropak
jauzika eta saltoka…
Ai, estekak hautsi eta
ahal balezate eskapa!
Gonak astinduz dator,
firin-faran, haizea.
Banderak oro ailitez
haiek bezain ederrak!
Arratsean hostoek
goibel agurtzen dute
haizea, firin-faran,
doalarik urruntzen…